’سوئی دھاگا‘ کے پہلے گانے کی سوشل میڈیا پر دھوم

بالی ووڈ کے نوجوان اداکار ورون دھون کی آنے والی فلم ’سوئی دھاگا‘ کے پہلے گانے نے ریلیز ہوتے ہی سوشل میڈیا پر دھوم مچادی۔

بالی ووڈ فلم نگری کے معروف اداکار ورون دھون اور اداکارہ انوشکا شرما ان دنوں اپنی آنے والی فلم ’سوئی دھاگا: میڈ ان انڈیا‘ کی تشہیر میں مصروف ہیں۔ اس حوالے سے فلم کی تشہیر کے لیے بالی ووڈ کے دیگر اداکاروں کو سوئی میں دھاگا ڈالنے کا چیلنج بھی دیا گیا ہے اور فلم کی مقبولیت کو چار چاند لگانے کے لیے فلم کا پہلا گیت جاری کردیا گیا ہے۔

غیر ملکی  میڈیا رپورٹس کے مطابق فلم ’سوئی دھاگا‘ کے پہلے گیت ’سب بڑھیا ہے‘ نے ریلیز ہوتے ہی سوشل میڈیا پر مقبولیت حاصل کی جس کا اندازہ اس بات سے لگایا جا سکتا ہے کہ 3 منٹ 55 سیکنڈ کے اس گیت کو یوٹیوب پر محض 3 دن میں 35 لاکھ سے زائد بار دیکھا جاچکا ہے۔ یہ گیت ورون دھون پر فلمایا گیا ہے جس میں گلوکار سکھ وندر سنگھ نے اپنی آواز کا جادو جگایا ہے۔

واضح رہے کہ شرت کتریا کی ہدایت کاری میں بننے والی فلم  ’سوئی دھاگا‘ میں ورون دھون اور انوشکا شرما مرکزی کردار ادا کر رہے ہیں یہ فلم رواں سال 28 ستمبر کو سنیما گھروں کی زینت بنے گی۔