پہلی کامیابی کے بعد نیا منصوبہ

اداکارہ اور ماڈل اریبہ حبیب اب ٹی وی ڈراموں میں کام کرنے کے ساتھ ساتھ اپنا ویڈیو لاگنگ شروع کرنے کا بھی ارادہ کررہی ہیں۔اریبہ اپنے ویڈیو لاگز میں مداحوں کو اپنی روز مرہ کی زندگی سے آگاہ کریں گی، جبکہ ایسا کرنے کا مقصد صرف یہ ہے کہ لوگوں کو اس بات کا اندازہ ہو کہ مشہور شخصیات بھی عام لوگوں کی طرح ہی زندگی گزارتی ہیں۔

اس ہی حوالے سے بات کرتے ہوئے اریبہ کا کہنا تھا کہ ’پاکستان میں لوگ سمجھتے ہیں کہ مشہور شخصیات انسان نہیں، وہ سمجھتے ہیں کہ شاید ہم عام لوگوں کی طرح زندگی نہیں گزارتے، یہی وجہ ہے کہ جب بھی کوئی نئی تصویر سامنے آتی ہے یا کسی کے حوالے سے کوئی افواہ سامنے آتی ہے تو لوگ اس کے پیچھے پڑ جاتے ہیں، میں اس عمل کو ختم کرنا چاہتی ہوں‘۔اس ہی حوالے سے اریبہ حبیب نے اپنا یوٹیوب چینل بھی بنا لیا ہے، جس پر انہوں نے اپنی پہلی ویڈیو بھی شیئر کردی۔اس ویڈیو میں اداکارہ نے بتایا کہ وہ اپنے فالوورز کو اپنی زندگی کا ایک دن یا پھر شوٹنگ کے دوران کا وقت دکھائیں گی۔

ان کا کہنا تھا کہ ’میں لوگوں کو دکھانا چاہتی ہوں کہ ہم بھی ان کی طرح کسی کی بیٹی، بہن، رشتہ دار ہیں، ہمارے بھی دوست ہیں، ہم بھی اسکول اور یونیورسٹی جاچکے ہیں، ہم بھی باہر جاکر کھانا کھانا پسند کرتے ہیں، ہم بھی سستے کپڑے خریدتے ہیں، ہمیں بھی ایک بجٹ کے اندر اپنا گھر چلانا ہوتا ہے، ہمارے پاس ہمیشہ بہت پیسے نہیں ہوتے‘۔اداکارہ کے مطابق ’جب ہم اپنے مداحوں کو خود دکھائیں گے کہ ہم اپنے گھروں میں کھانا بناتے ہیں، اپنے گھروں کی صفائی بھی کرتے ہیں، تب ہی وہ ہمیں انسان سمجھنا بھی شروع کردیں گے، ساتھ ساتھ میں اپنی ویڈیوز میں میک اپ ٹپس بھی دوں گی‘۔