سری لنکن وزیراعظم مہنداراجہ پاکسے نے عہدے سے استعفیٰ دے دیا، تجزیہ کار استعفیٰ کو ہونے والی ’’ڈیل‘‘ کا نتیجہ قرار دینے لگے۔ 

بین الاقوامی خبر رساں ادارے کے مطابق سری لنکا کے وزیراعظم مہندا راجا پاکسے نے ملک میں سیاسی استحکام اور تنازعات کے خاتمے کے لیے اپنے عہدے سے استعفیٰ دے دیا ہے لیکن تجزیہ کار استعفے کو ’ڈیل‘ کا نتیجہ قرار دے رہے ہیں۔

سیاسی بحران کا آغاز رواں برس اکتوبر سے ہوا جب صدر سری سینا نے اپنی ہی حکومت کے وزیر اعظم وکرم سنگھے کو برطرف کر کے اپوزیشن لیڈر راجا پاکسے کو وزیراعظم مقرر کردیا جب کہ وزیراعظم وکرم سنگھے نے صدر کے فیصلے کو ماننے سے انکار کردیا۔ راجا پاکسے کے استعفیٰ سے سری لنکا میں دو ماہ سے جاری اقتدار کی کشمش کا خاتمہ ہوجائے گا جب کہ وکرم سنگھے اتوار کو اپنے دفتر میں ذمہ داریاں سنبھالیں گے جہاں سے انہیں صدر سری سینا نے دو ماہ قبل بے دخل کردیا تھا۔

صدر کے فیصلے کے خلاف حکمراں جماعت عدالت میں گئی لیکن اس سے قبل ہی صدر نے نئے انتخابات کی تاریخ کا اعلان کردیا۔ سپریم کورٹ نے تاریخی فیصلے میں صدر کے وزیراعظم کو برطرف کرنے کے فیصلے کو کالعدم قرار دے کر انتخابی عمل روک دیا۔ادھر صدر کی جانب سے وزیراعظم بنائے جانے والے راجا پاکسے نے پارلیمنٹ سے اعتماد کا ووٹ حاصل کرنے کے لیے سر دھڑ کی بازی لگا دی لیکن وہ اپنی کوشش میں ناکام رہے۔ بعد ازاں پارلیمنٹ نے برطرف کیے گئے وزیراعظم وکرم سنگھے پر اعتماد کا اظہار کردیا۔

سپریم کورٹ کے فیصلے اور پارلیمنٹ کے عدم اعتماد کے باوجود راجا پاکسے اپنا عہدہ چھوڑنے کو تیار نہیں تھے جس کے لیے انہیں صدر متھری پالا سری سینا کی حمایت بھی حاصل تھی یوں ’بحران‘ بڑھتا گیا جوں جوں دوا کی۔ سپریم کورٹ کے فیصلے کے بعد حکمراں جماعت کو عوامی حمایت حاصل ہوگئی اور صدر کے خلاف ملک گیر مظاہرے شروع ہوگئے جس نے صدر سری سینا اور وزیراعظم کے عہدہ نہ چھوڑنے پر بضد راجا پاکسے کو گھٹنے ٹیکنے پر مجبور کردیا۔ حکمراں جماعت کے ترجمان نے راجا پاکسے کے مستعفی ہونے کی تصدیق کرتے ہوئے میڈیا کو بتایا کہ وکرم سنگھے دوبارہ اپنا دفترجوائن کرلیں گے۔ صدر سری سینا نے وکرم سنگھے سے حلف لینے پر ا?مادگی ظاہر کردی ہے۔ اتوار کو تقریب حلف برداری منعقد ہوگی۔

بھارتی ریاست کرناٹک میں نئے مندر کی تعمیر کا جشن، زہریلا کھانا کھانے سے 11 افراد ہلاک ، درجنوں کی حالت غیر ہونے پر اسپتال پہنچ گئے۔ 

تفصیلات کے مطابق بھارتی ریاست کرناٹک کے ضلع چماراج نگر میں نئے مندر کی تعمیر کے جشن کے دوران کھانا کھانے سے کئی لوگوں کی حالت غیر ہوگئی۔ تقریب میں شامل ایک شخص نے بتایا کہ انہیں چاولوں اور ٹماٹروں سے بنا کھانا پیش کیا گیا تھا، جس میں سے بْو آ رہی تھی اور جسے کھانے کے بعد لوگوں کو پیٹ میں درد اور قے شروع ہوگئی، جس پر انہیں اسپتال منتقل کیا گیا۔ حکام کے مطابق زہریلا کھانا کھانے والے 93 افراد کو اسپتال لے جایا گیا، جہاں 23 افراد کی حالت تشویش ناک بتائی گئی۔پولیس کے مطابق واقعے کے بعد کھانے کے نمونوں کو کیمیائی تجزیے کے لیے تحویل میں لے لیا گیا جبکہ 2 افراد کو بھی حراست میں لیا گیا۔

مقبوضہ کشمیر میں بھارتی فوج نے فائرنگ کرکے 9 نوجوانوں کو شہید اور درجنوں کو زخمی کردیا۔مقبوضہ کشمیر میں بھارتی فوج کی ریاستی دہشت گردی کا سلسلہ جاری ہے۔ قابض فوج نے ضلع پلوامہ کے علاقے خارپورا میں آپریشن کرتے ہوئے 3 کشمیری نوجوانوں ظہور ٹھوکر، عدنان اور منظور کو شہید کردیا۔

بے گناہ نوجوانوں کی شہادت پر کشمیریوں کی بڑی تعداد سڑکوں پر نکل آئی اور بھارتی جارحیت کے خلاف شدید احتجاج کیا جس کے دوران مظاہرین اور فوج کے درمیان شدید جھڑپیں ہوئیں۔ قابض افواج نے نہتے مظاہرین پر فائر کھول دیا جس سے مزید 7 نوجوان شہید اور درجنوں زخمی ہوگئے۔ دو نوجوانوں کی شناخت عامر احمد اور عابد احمد لون کے نام سے ہوئی۔