سعودی ولی عہد محمد بن سلمان کا طیارہ جیسے ہی پاکستانی فضائی حدود میں داخل ہوا تو معززمہمان کا شایان استقبال شروع کر دیا گیا۔ پاک فضائیہ کے ایف 16 اور جے ایف 17 تھنڈر طیاروں نے شاہی طیارے کو اپنے حصار میں لے لیا۔

 پاکستانی فضائیہ کے طیاروں نے معزز مہمان کے طیارے کے دائیں اور بائیں فارمیشن میں پرواز کرتے ہوئے انہیں بحفاظت منزل مقصود تک پہنچایا۔

دورے پر آنے والے برادر ممالک کے سربراہان کو اس انداز میں خوش آمدید کہنا پاکستان اور پاک فضائیہ کی درخشاں روایت رہی ہے۔

وزیراعظم عمران خان اور پاک فوج کے سربراہ سمیت اہم سیاسی اور عسکری شخصیات نے سعودی ولی عہد محمد بن سلمان کا ایئرپورٹ پر استقبال کیا۔انہوں نے فرداً فرداً تمام استقبال کیلئے آئے تمام میزبانوں سے پرجوش مصافحہ کیا۔ بچوں نے معزز مہمان کو گلدستے پیش کیے، اس موقع پر محمد بن سلمان نے بچوں کا بوسا لیا اور مسکراتے ہوئے ان کے تحفے کو قبول کیا۔

وزیراعظم عمران خان نے معزز مہمان سعودی ولی عہد محمد بن سلمان کی گاڑی خود ڈرائیو کی اور وزیراعظم ہاؤس پہنچایا جہاں انھیں پاک آرمی کے چاک وچوبند دستے نے گارڈ آف آنر پیش کیا گیا۔ معزز مہمان کو اکیس توپوں کی سلامی بھی دی گئی۔

سعودی ولی عہد شہزادہ محمد بن سلمان کی پاکستان آمد جڑواں شہروں کو دلہن کی طرح سجایا گیا ہے۔ شاہراہیں خیر مقدمی بینرز، سعودی اور پاکستانی پرچموں سے سجی ہوئی ہیں۔

خیال رہے کہ سعودی ولی عہد محمد بن سلمان دو روزہ دورے پر آج پاکستان تشریف لائے ہیں۔ ان کے شاہی ڈاکٹرز، سیکیورٹی اور دیگر عملے پر مشتمل 221 افراد پہلے ہی 7 طیاروں پر پاکستان پہنچ چکے ہیں۔

 سعودی ولی عہد شہزادہ محمد بن سلمان نے کہا ہے کہ 20 ارب ڈالرز کے معاہدے پاکستان میں سعودی سرمایہ کاری کا پہلا مرحلہ ہے، سعودی عرب پاکستان میں مزید سرمایہ کاری کرے گا۔

وزیراعظم ہاؤس اسلام آباد میں وزیراعظم عمران خان کی جانب سے سعودی ولی عہد شہزادہ محمد بن سلمان کے اعزاز میں عشائیہ دیا گیا جس سے خطاب میں سعودی ولی عہد نے کہا کہ یقین ہے وزیراعظم عمران خان کی قیادت میں پاکستان بہت آگے بڑھےگا، پاکستان کا مستقبل روشن ہے۔

سعودی ولی عہد شہزادہ محمد بن سلمان نے کہا کہ ولی عہد بننے کے بعد ان کا یہ ایشیا کا پہلا دورہ ہے اور وہ سب سے پہلے پاکستان آئے ہیں۔

 سعودی پاک سپریم کوآرڈی نیشن کونسل کا افتتاحی اجلاس ہوا۔ وزیراعظم عمران خان اور سعودی ولی عہد نے افتتاحی اجلاس کی مشترکہ صدارت کی۔

اعلیٰ اختیاراتی کونسل کے قیام کی تجویز ولی عہد محمد بن سلمان نے عمران خان کے دورہ سعودی عرب میں دی تھی۔ کونسل کا مقصد دو طرفہ معاہدوں اور فیصلوں پر بروقت عمل درآمد کو ممکن بنانا ہے۔

کونسل میں خارجہ، دفاع، توانائی، دفاعی پیداوار اور تجارت کے وزرا شامل ہیں جبکہ کونسل میں اطلاعات، ثقافت، داخلہ، سرمایہ کاری اور آبی وسائل کے وزرا بھی موجود ہیں۔

کونسل کے تحت سٹیرنگ کمیٹی اور مشترکہ ورکنگ گروپس بھی قائم کیے گئے ہیں۔ ورکنگ گروپس کا مقصد متعلقہ شعبوں میں وزرا کے لیے سفارشات تیار کرنا ہے۔ دونوں ممالک کے وزرا خارجہ کونسل کے معاملات دیکھیں گے۔ کونسل کا سالانہ اجلاس پاکستان اور سعودی عرب میں باری باری ہوگا۔