دبئی: 450 پاکستانیوں کا جائیداد خریدنے کا انکشاف

سپریم کورٹ کی ہدایت پر قائم کمیٹی نے دبئی میں پاکستانیوں کی جائیدادوں کے معاملے میں 893 مالکان کو نوٹس بجھوائے جن میں سے 450 افراد نے جائیدادوں کی ملکیت تسلیم کرلی باقی ماندہ 443 افراد نے تاحال کوئی جواب نہیں دیا، جائیدادوں کے مالکان کے نام ایف بی آر کو مزید تحقیقات کے لیے بجھوائے جائیں گے۔

بقیہ افراد نے دو ہفتوں میں جواب نہ دیا تو وہ متعلقہ جائیدادوں کے مالک تصور نہیں ہوں گے اور جائیدادوں کو بے نامی قرار دے کر بحق سرکار ضبط کرنے کی کارروائی کی جائے گی۔

تفصیلات کے مطابق دبئی میں تقریباً 7 ہزار پاکستانیوں نے جائیدادیں خرید رکھی ہیں۔ اربوں ڈالر کا سرمایہ پاکستان سے کیسے اور کیوں منتقل ہوا؟ جس کے لیے سپریم کورٹ نے ایک خصوصی کمیٹی بنانے کا حکم دیا، اس کمیٹی کی نگران بھی سپریم کورٹ ہی ہے۔

کمیٹی نے پہلے مرحلے میں 893 پاکستانیوں کو نوٹس بھیجے جس میں سے 450 افراد نے جائیدادوں کو تسلیم کیا۔

باقی443 افراد کے جواب کا انتطار ہے، اگر دو ہفتوں میں ان لوگوں نے جواب نہ دیا تو وہ متعلقہ جائیدادوں کے مالک تصور نہیں ہوں گے اور بے نامی قرار دے کر بحق سرکار ضبط کرنے کی کارروائی کی جائے گی، اس حوالے سے پاکستان، دبئی کی حکومت سے رابطہ کرے گا اور ضرورت پڑی تو قانونی جنگ بھی لڑے گا۔

ذرائع کے مطابق جن افراد کو نوٹس بھیجے گئے ہیں ان میں سے اب تک کسی نے متعلقہ جائیداد کا مالک ہونے کی تردید نہیں کی ہے۔

جو افراد جائز ذرائع آمدن، ٹیکس کی ادائیگی اور رقم کی قانونی ذرائع سے منتقلی ثابت نہ کرسکے ان کے خلاف کارروائی ایف بی آر کی ذمہ داری ہوگی۔