مسلم لیگ ن کے رکن قومی اسمبلی رانا ثناء اللہ نے وفاقی وزیر ریلوے شیخ رشید کو وزیراعظم عمران خان کا چپڑاسی قرار دے دیا ۔ 

شیخ رشید نے قائد حزب اختلاف شہباز شریف کے چیئرمین پبلک اکاؤنٹس کمیٹی بننے پر ردعمل دیتے ہوئے کہا تھا کہ دودھ کی رکھوالی پر بلا بٹھانے کے فیصلے سے ہمیں پزیرائی نہیں ملی۔ ان کا مزید کہنا تھا کہ اگر شہباز شریف ایماندار ہیں تو پھر مسلم لیگ ن میں کوئی بھی بے ایمان نہیں ہے۔ وفاقی وزیر کے بیان پر رانا ثناء اللہ نے بھی شیخ رشید کو آڑے ہاتھوں لیتے ہوئے شدید تنقید کا نشانہ بنایا۔ رانا ثناء اللہ نے کہا کہ جس طرح یوٹرن کا معنیٰ عمران خان ہے، ویسے ہی مفاد پرستی کا دوسرا نام شیخ رشید ہے۔

انہوں نے شیخ رشید کو عمران خان کا چپڑاسی قرار دیتے ہوئے کہا کہ ایسے لوگوں نے ہر دور میں جمہوریت کو نقصان پہنچانے کی کوشش کی۔ ن لیگ کے رکن قومی اسمبلی نے کہا کہ حکومت کے نام پر جوکروں کا سرکس جاری ہے، پاکستان کے عوام جلد ہی ان کا محاسبہ کریں گے۔

بھارتی جاسوس قیدی سربجیت سنگھ قتل کیس، سیشن کورٹ نے گواہوں کے منحرف ہونے پر فیصلہ سناتے ہوئے 2 ملزمان کو بری کر دیا ۔ 

ذرائع نے بتایا ہے کہ سیشن کورٹ نے بھارتی جاسوس قیدی سربجیت سنگھ کے قتل کیس میں ملوث 2 ملزمان کو بری کرنے کا حکم دے دیا۔ ایڈیشنل سیشن جج معین کھوکھر نے عامر تانبا اور مدثر منیر کو بری کرنے کا حکم دیا۔ عدالت نے تمام گواہان کے منحرف ہونے پر کیس کا فیصلہ سنایا، دونوں ملزمان پر بھارتی جاسوس کو اینٹیں مار کر قتل کرنے کا الزام تھا جبکہ دونوں ملزمان کے خلاف تھانہ کوٹ لکھپت پولیس نے مقدمہ درج کر رکھا تھا۔

حکومت نے تربت میں سرحد پار دہشتگردوں کے حملہ میں ایف سی جوانوں کی شہادت پر ایران سے شدید احتجاج کرتے ہوئے ایرانی سفیر کو دفتر خارجہ طلب کر لیا ہے۔ 

ترجمان دفتر خارجہ کے مطابق گزشتہ شب تربت میں دہشت گردوں کے حملے میں 6 ایف سی جوانوں کی شہادت پر پاکستان نے ایران سے سفارتی سطح پر احتجاج کرتے ہوئے پاکستان میں متعین ایرانی سفیر کو دفتر خارجہ طلب کیا اور احتجاج کے دوران حکومت ایران سے واقعہ میں ملوث دہشت گردوں کے خلاف فوری آپریشن کا مطالبہ کیا۔