وفاقی وزیر برائے بین الصوبائی تعاون فہمیدہ مرزا، آئی ٹی منسٹر خالد مقبول صدیقی اور وفاقی وزیر برائے فوڈ سکیورٹی محبوب سلطان کو پرفارمنس میں بہتری کیلئے تین ماہ کی مہلت دیدی گئی۔

ذرائع کے مطابق وزیراعظم عمران خان نے وفاقی کابینہ کے تین اہم وزرا کی کارکردگی پر عدم اطمینان کا اظہار کرتے ہوئے انھیں اپنی کارکردگی بہتر بنانے کیلئے تین ماہ کی ملت دیدی ہے۔ ذرائع کے مطابق وزیراعظم نے فہمیدہ مرزا، خالد مقبول صدیقی اور محبوب سلطان کی کارکردگی پر اظہارِ عدم اطمینان کرتے ہوئے بین الصوبائی رابطہ، آئی ٹی اور نیشنل فوڈ سکیورٹی کے وزرا کو کارکردگی بہتر بنانے کی ہدایت کر دی ہے۔ تین ماہ بعد تینوں وفاقی وزراء کی کارکردگی کا دوبارہ جائزہ لیا جائے گا۔

تحریک انصاف کی اتحادی جماعت ایم کیو ایم کے کنوینر خالد مقبول صدیقی پہلے بھی وزیر رہ چکے ہیں مگر عمران خان ان کی بطور آئی ٹی منسٹر پرفارمنس سے مطمئن نہیں ہیں۔ جی ڈی اے کی فہمیدہ مرزا پیپلز پارٹی کی اچھی کھلاڑی سمجھی جاتی تھیں مگر عمران خان کا پرفارمنس ٹیسٹ پاس نہیں کر سکیں۔ وزیراعظم نے انھیں کارکردگی ٹھیک کرنے کی ہدایت کی ہے۔

لاہور اور گردونواح میں زلزلے کے جھٹکے محسوس کیے گئے جس سے شہریوں میں شید خوف وہراس پھیل گیا۔

زلزلہ پیما مرکز کے مطابق لاہور اور اس کے گردونواح میں چار اعشاریہ ایک شدت کا زلزلہ ریکارڈ کیا گیا، زلزلے کے جھٹکوں سے لوگوں میں خوف وہراس پھیل گیا اور وہ کلمہ طیبہ کا ورد کرتے گھروں سے نکل آئے۔

آرمی چیف جنرل قمر جاوید باجوہ کا دورہ قطر، امیر قطر اور وزیراعظم سے ملاقاتیں کیں، مختلف شعبوں میں دوطرفہ تعاون بڑھانے کے امور پر تبادلہ خیال کیا گیا۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے قطر کے قومی دن کے حوالے سے پریڈ میں شرکت کی اور قطر کی مسلح افواج کے چیف آف سٹاف لیفٹیننٹ جنرل غنیم بن شاہین کو شاندار پریڈ کے انعقاد پر مبارکباد دی۔ جنرل قمر جاوید باجوہ نے امیر قطر شیخ تمیم بن حماد الثانی سے ملاقات بھی کی، امیر قطر نے افغانستان سمیت علاقے میں استحکام کے لیے پاکستان کے مثبت کردار کو سراہا۔

آرمی چیف نے افغانستان میں امن کے لیے سیاسی بات چیت کی حمایت پر امیر قطر کا شکریہ ادا کیا، ملاقات میں باہمی سیکیورٹی تعاون بڑھانے کے حوالے سے بھی غور کیا گیا۔ آرمی چیف نے قطر کے وزیراعظم شیخ عبداللہ بن النصیر سے بھی ملاقات کی، قطری وزیراعظم نے سیکیورٹی سمیت مختلف شعبوں میں تعاون بڑھانے کی خواہش کا اظہار کیا، آرمی چیف جنرل قمر جاوید باوجوہ نے قطری قیادت کو تمام شعبوں میں پاکستان کے تعاون کا یقین دلایا۔