انسٹا گرام کا ہراسمنٹ کے واقعات روکنے کیلئے بڑا فیصلہ

نئے فیچر سے لوگوں کو کمنٹس پوسٹ کرنے سے قبل نظرثانی اور اسے منسوخ کرنے کا پیغام دیا جائے گا

سماجی رابطے کی ویب سائٹ انسٹاگرام نے ہراسمنٹ کے واقعات روکنے کیلئے بڑا فیصلہ کیا ہے اور اس کے لیے نیا فیچر متعارف کروانے کا اعلان کر دیا ہے۔

انسٹاگرام کے بانی ایڈم موسیری کے مطابق ’رسٹرکٹ‘ فیچر متنازع پوسٹ کرنے سے پہلے صارفین کو متنبہ کرے گا۔انسٹاگرام کے بانی کا کہنا تھا کہ یہ ہماری ذمہ داری ہے کہ تمام صارفین کو محفوظ ماحول فراہم کریں، ہمیں کافی عرصے سے صارفین مختلف شکایات درج کروارہے تھے، امید ہے اس فیچر کے ذریعے صارفین کو بہتر ماحول ملے گا۔ انہوں نے کہا کہ نئے فیچر سے لوگوں کو کمنٹس پوسٹ کرنے سے قبل نظرثانی اور اسے منسوخ کرنے کا پیغام دیا جائے گا، اگر صارف نے پھر بھی کوئی نازیبا کمنٹ کیا تو اْسے رپورٹ ہونے کی صورت میں کمپنی کی جانب سے ایکشن لیا جائے گا۔

فیچر کے حوالے سے گفتگو کرتے ہوئے انہوں نے بتایا کہ رسٹرکٹ کی سہولت پہلے چند صارفین کو دی گئی اور اس کی آزمائش کی گئی، اس دوران لوگوں کا مثبت ردعمل سامنے آیا اور سہولت استعمال کرنے والوں نے اپنے کمنٹس منسوخ بھی کیے۔ ان کا کہنا تھا کہ انسٹاگرام وہ واحد ادارہ ہے جو نازیبا کلمات کی تشہیر کو عملی طور پر محدود کرنے جارہا ہے، اس فیچر کے ذریعے صارفین کو یہ بھی فائدہ ہوگا کہ وہ نفرت آمیز مواد شیئر کرنے والے صارف کو ’رسٹرکٹ‘ کرسکیں گے جس کے ذریعے رسٹرکٹ کیا گیا صارف نا تو کوئی کمنٹ کرسکے گا اور نا ہی اسے ’ڈی ایم‘ میں میسیج پڑھے جانے کا علم ہوگا۔

You might also like